Элсэгчид шалгалтын хураамжаа онлайнаар шилжүүлээрэй

Энэ жил оюутан болж, их, дээд сургуульд суралцахаар төлөвлөж буй хүүхдүүдийг интернэтээр, тэр дундаа www.eec.mn гэсэн цахим хаягаар бүртгэж байгаа.

Энэ шалгалтанд 2011 онд ерөнхий боловсролын сургууль төгсөгчдөөс гадна Монгол Улсын их дээд сургуулиудад элсэхийг хүссэн хүн бүхэн оролцох боломжтой юм. Тиймээс танд цахим бүртгэлийн тухай бяцхан зөвлөгөө өгье.

Шалгалтынхаа хураамжийг төлсөн тохиолдолд бүртгэнэ

Энэ жилийн шалгалтын хураамж 4800 төгрөг. Батламж карт 700 төгрөг. Шалгуулагч хэдэн ч шалгалт өгсөн нэг батламж карттай байна. Тиймээс онлайнаар бүртгүүлж буй хүүхдүүд шалгалтынхаа хураамжийг төлсөн тохиолдолд бүртгэдэг гэдгийг анхаараарай.

Онлайн бүртгэлийн төлбөр тооцоог интернэтээр хийх бөгөөд үүний тулд бүртгүүлэгч Хаан банкнаас бусад төрлийн VISA болон Мастер төрлийн төлбөрийн карттай байх хэрэгтэй гэдгийг мартаж болохгүй. Төлбөрийг Голомт болон Худалдаа хөгжлийн банк, Улаанбаатар, Монгол шуудан, Капитрон, Хас банкны мастер болон виза картаар шилжүүлж болно. Харин хөдөө орон нутгийн хүүхдүүд шалгалтынхаа хураамжийг Голомт банк дахь Боловсролын үнэлгээний төвийн 1102862121 тоот дансанд тушаагаарай. Үүнийхээ дараа Боловсролын үнэлгээний төвийн цахим хуудаст зочилж, өөрийгөө бүртгүүлээрэй.

Ингэхдээ бүх мэдээллийг үнэн зөв бөглөх хэрэгтэй. Учир нь таны илгээсэн энэ мэдээлэлд тулгуурлан таны шалгалтын дүнг эргэж мэдээлэх, батламжийг хэвлэх юм.

Шалгалтын бүртгэл ирэх дөрөвдүгээр сарын 22-ыг хүртэл үргэлжилнэ. Хугацаа, цагийг нь сунгахгүй бас нэмэлт бүртгэл хийхгүй учир дээрх хугацаанд амжиж бүртгүүлээрэй.

Танд элсэлтийн шалгалтад хэрхэн бүртгүүлэх зааварчилгааг хүргэе.