Бичлэг тандагчЭэждээ захидал бичээрэй
2011-06-01,23:10
Яруу найрагч Ц. Хулангийн дурсамж “ Зүгээр л нэг амьдрахсан” номоос Ээж минь гучин долоохон насандаа ээжгүй болсон юм. Тэгэхэд яаж өнчирснийг нь дөнгөж одооноос л ухаарах шиг санагдана. Учир нь нэг удаа ээж өвдөөд , би тэгэхэд үхтлээ айж амьдралдаа анх удаа , ээжгүй болчих вий гэхээс нуруу зарсхийх шиг болсон. Энэ бол зүгээр л нэг хүүхдийн гэнэн айдас биш, харин өөрөө том хүн болж хараахан туулаагүй байгаа ертөнцийн жамын өмнө хүчин мөхөсдөх тэр айдас юм. / Ц. Хулан / “ Ганцхан ижийдээ унших шүлэг ”
Намрын уулнаа бугын урамдахыг сонсоорой
Намайг ухаажихыг үзэх гэж эжий минь та урт наслаарай
Манцуйдаа ирж таныг би ганцхан удаа жаргаасан
Магадгүй тэрнээс хойш дандаа зовоосон
Ганцхан намайг гэж ижий та
Газар дээр хичнээн увидастай төрсөн юм бэ?
Баривчийг минь эсгэж , хуримын өмсгөл чимэглэж
Балчраас минь өдийг хүртэл та оёдолчин явлаа.
Оточ маналын хувилгаан ийм байдаг уу гэлтэй
Орон дээрээс минь алгасалгүй тонгойж
Дэрэн дээр бүлээрч хонох болгонд
Дэлхийд хамгийн сайн эмч минь та байлаа
Аягаа хагалан эрхэлж ядсан намайг
Аргадсандаа алиалагч болж өмнө минь эргэлдсэн
“ А” үсэг бичих гээд будилж цөхөж суухад минь
Алдаатай байхад нь улаан цайм онц тавьдаг багш явлаа.
Цаг оройтсон болзооноос эргэж ирэхэд
Цагдаа эсвэл үүдний манаач
Сар нарны ээлжгүй гал сахисан тогооч
Сангийн бойпорт арц уугиулж , маань уншсан лам аа
Шүхэрт тэнгэрийн доор алдаж эндэх тоолонд минь
Шүүхийн тогтоол уншдаг яллагч нь та мөртлөө
Даамай их хайр тань аанай л хэвээрээ
Давж заалдсан өмгөөлөгч болж зовлонгоос намайг суллана
Жигжид бурхныг олон мутартай гэлцэнэ
Жижигхэн энэ бие тань түүнээс ч олон гартай
Элбэг их хайр ижий гэдэг нэр тань
Энэ орчлонгоос авсан хамгийн том алдар аа
Зүүний сүвэгчээр ч багтах он жилийн урсгалд
Зүгээр л дэргэд минь байж хайрла.
Ижий гэж дуудах болгондоо баярладаг
Ижил хэдэн хүүхдэдээ урт насалж хайрла
Үгийн сан
1. Увидас – нууц эрдэм , чадал , увидас үзүүлэх
2. Манцуй – нялх хүүхдийг өлгийдөх өлгий
3. Оточ – их эмч
4. Хувилгаан – шашин юманд хувилж чаддаг чадал бүхий зүйл
5. Мутар – гарын хүндэтгэл нэр
6. Баривч – нялх хүүхдийн өмсдөг дээл
бичсэн: sainsanaa төрөл: МХУЗ-ын хичээлийн хэрэглэгдэхүүн |
(1) Сэтгэгдэл | найздаа илгээх | Уншсан: 455 удаа
eej Ariunaagaas (зочин) хэзээ бичсэн: 15:38, 2011-06-03 | |
