Бичлэг тандагчЦахим хэрэглээнд монгол бичгээ ашиглах боломжтой боллоо
2011-02-14,12:13
Цахим хэрэглээнд монгол бичгээ ашиглах боломжтой боллоо
Бид чихнээ чимэг болсон аялгуу сайхан монгол хэлтэй атлаа өдгөө хүртэл хуучин монгол бичгээ умартан харийн үсгийг үйл хэрэг, амьдрал ахуйдаа ашигласаар ирсэн билээ.Харин 1990 оноос өвөг дээдсээс уламжлагдан ирсэн тэрхүү босоо бичгээ сэргээх, олон нийтэд түгээн дэлгэрүүлэх, хүн бүрийг хуучин монгол бичигтэй болгох тал дээр анхаарах болж Ерөнхий боловсролын сургуулиудад “монгол бичгийн хичээл” орж эхэлсэн.
Гэвч техник технологийн эрин үед бид компьютер дээр буюу цахим хэрэглээнд үндэсний бичиг соёлоо нэвтрүүлж ашиглаж чадахгүй байсаар өдийг хүрсэн.
Тэгвэл энэ асуудал шийдэгдэж Засгийн газрын 2008 оны 196 дугаар тогтоолоор баталсан “Монгол бичгийн үндэсний хөтөлбөр -2”-ыг хэрэгжүүлэх ажлын хүрээнд ЕБС-д цахим мэдээллийн UNICODE-д тулгуурласан монгол бичгийг сургалтанд ашиглах иж бүрэн программ хангамжийг боловсруулах ажлыг БСШУЯ, ШУТИС хамтарсан гэрээний үндсэн дээр хийж дуусгасан байна.
2011 оноос эхлэн тус программыг сургалтанд нэвтрүүлэх бэлтгэл ажлыг хангах зорилгоор ЕБС-ын монгол хэл, бичиг, мэдээлэл зүйн багш нарт зориулсан сургалтыг үндэсний түвшинд үе шаттай зохион байгуулахаар төлөвлөжээ.
Энэхүү монгол бичгийн программыг ямар ч хүн компьютертээ суулган ашиглах боломжтой бөгөөд криллээс монгол бичигт хөрвүүлэх, дүрмийн мэдээлэл авах, дөрвөлжин, тод бичгийг бие даан сурах зэрэг ач холбогдолтой юм байна.
Тус программ нь нийт 5000 хувь хэвлэгдсэн бөгөөд эхний ээлжинд аймаг, нийслэлийн бүх ЕБС, боловсролын байгууллагууд үнэгүй түгээгдэж, цаашлаад олон нийтийг монгол бичигт сургах, тус программыг ашиглах боломжийг бүрдүүлэх зорилгоор БСШУЯ-ны вэб-д байршуулах, хэрэглэгчид үнэгүй татан авах боломжийг буй болгох ажээ
